Olve Øyehaug og friidrettsgruppa i Ørsta kan trygt sleppe jubelen laus.

Årsaka? Ørsta formannskap sa tysdag ja til å hjelpe til med å fullfinansiere nytt løpedekke på Ørsta stadion.

Arbeidet med å fullføre stadion - og legge nytt løpedekke tok til i sommar. Men så viste det seg til friidrettsgruppa si forskrekking at prosjektet vart over ein million kroner dyrare enn først rekna med.

Så den 29.august sende Ørsta IL friidrett søknad til Ørsta kommune om ekstra finansiering på vel ein million kroner. Dermed heiv arministrasjonen seg rundt og fann ei løysing - nemleg at Ørsta kommune forskotterer 85% av godkjend søknadsum til spelemidlar til Ørsta IL friidrett med inntil 850 000 kroner, og i tillegg gjev 60,000 kroner til dugnadsinnsats.

Eit samrøystes Ørsta formannskap vedtok denne løysinga - noko dei kunne gjere fordi dei tidlegare på møtet tysdag hadde vedtatt at kommunen opprettar eit forn for forskotering av spelemidlar til idrettsanlegg.

Ordførar Stein aam rosa administrasjonen for å ha kome fram til det han meinar er ei glimrande løysing. - Utan dette hadde ikkje skulane hatt eit brukbart anlegg. flott at de på kort tid fann ei løysing, sa ordføraren.

komunedirektøren Wenche Solheim gav æra til økonomisjefen: - Ja, det går fint når folk brukar kvelden. takk for det, Bueide!

Møre-Nytt - 8.september 2023

Svein Nordal